في وقت مش بعيد، كان أي فنان بيبدأ رحلته بحاجة واحدة أساسية: الموهبة…
وبعدها ييجي التدريب، والتعب، ومع الوقت تبدأ الشهرة.
لكن دلوقتي، الصورة اختلفت شوية.
ممكن حد يحقق شهرة كبيرة جدًا من فيديو قصير على تيك توك…
وبعدها فجأة نلاقيه بيقدم إعلان، أو داخل تجربة تمثيل، أو حتى بيغني.
وهنا بيظهر السؤال:
هل بقت الشهرة هي الطريق للنجاح؟ مش الموهبة؟
إيه اللي اتغير؟
زمان، كان الطبيعي إن الموهبة تيجي الأول… وبعدين الشهرة.
دلوقتي، بقى عادي جدًا إن الشهرة تيجي الأول… وبعدها الشخص يدور على فرصة.
السوشيال ميديا خلت الوصول للناس أسرع بكتير،
بس في نفس الوقت، خلت الانتشار أهم من الجودة أحيانًا.
واحدة من التجارب اللي بتوضح ده، هي تجربة يوسف داغر،
المعروف على السوشيال ميديا باسم “يوسف الفن”.
يوسف في مقابلة مع سين ستوديو حكى انه بدأ بفيديوهات كوميدية بسيطة على تيك توك،
وكان مؤمن بموهبته وبيحاول يطوّر نفسه.
ومع الوقت، قدر يحقق انتشار،
وده فتح له باب إنه يدخل مجال التمثيل في رمضان اللي فات.
وهو بيحكي عن إحساسه، قال:
“شعور حلو إنك توصل لحاجة بتحبها وبتسعى ليها من زمان.”
لكن الرحلة ما كانتش سهلة…
قال كمان إن الضغط الأكبر هو الاستمرار،
وإن لازم يفضل موجود وينزل محتوى طول الوقت علشان الناس ما تنساهوش.
وبيستمد أفكاره من مواقف يومية،
وبيحاول يقدمها بشكل بسيط وقريب من الناس.
ومن أكتر التعليقات اللي أثرت فيه كانت:
“أنا قفلت الواي فاي وفتحت الداتا عشان أتفرج عليك بفلوس”
ورغم عروض إعلانية كتير،
اختار يرفضها علشان ما يتحطش في قالب “بلوجر”،
ويركز أكتر على حلمه في التمثيل.
و قبل كده، شفنا نماذج نجحت بنفس الشكل، زي أحمد أمين،
اللي بدأ بفيديوهات على اليوتيوب ، وبعدها بقى واحد من أهم نجوم الكوميديا.
طيب… هل ده كله سلبي؟
مش دايمًا.
في ناس فعلاً موهوبة،
والسوشيال ميديا كانت سبب إنها توصل أسرع.
وفي ناس قدرت تثبت نفسها وتنجح بجد بعد الشهرة.
يعني المشكلة مش في الشهرة نفسها…
لكن في اللي بييجي بعدها.
واضح إن السوشيال ميديا غيرت قواعد اللعبة،
وبقت الشهرة أحيانًا بتسبق الموهبة.
لكن السؤال الحقيقي لسه موجود:
هل الفن فعلًا بيتغير؟
ولا إحنا اللي بقينا نختار الطريق الأسهل؟
