قدر مسلسل الفرنساوي يخطف اهتمام الجمهور من أول حلقتين، ويتصدر تريند السوشيال ميديا بعد التفاعل الكبير اللي حققه مع بداية عرضه.
وبيقدم عمرو يوسف شخصية المحامي “خالد مشير” المعروف بلقب “الفرنساوي”، واللي حياته بتتقلب فجأة بعد ما يبقى المتهم الرئيسي في جريمة قتل غامضة تخص حبيبته السابقة، لتبدأ بعدها سلسلة من الصراعات والأسرار المشوقة.
المسلسل اتحضر له حوالي 4 سنين قبل ما يخرج للنور، وده اللي ظهر في تفاصيل العمل والإنتاج، خاصة مع الإيقاع السريع للأحداث اللي خلّى الجمهور متعلق بكل حلقة.
كمان العمل مكوّن من 10 حلقات بس، وده زوّد حماس المشاهدين لمعرفة النهاية، خصوصًا مع تصاعد الأحداث بشكل مستمر.
ويشارك في بطولة المسلسل جمال سليمان وسوسن بدر وبيومي فؤاد، إلى جانب سامي الشيخ وإنجي كيوان وجنا الأشقر في عمل اصبح ينافس على لقب أقوى أعمال الموسم.
