رغم النجاح الكبير اللي حققه فيلم “Devil Wears Prada” وتحوله لواحد من أشهر أفلام الموضة في هوليوود، إلا إن كواليس التصوير كانت مليانة توتر وأزمات كادت توقف الفيلم أكتر من مرة.
وكشف المخرج ديفيد فرانكل بعد حوالي 20 سنة من عرض الفيلم، إن الشغل وقتها كان صعب جدًا، وإن نجاح العمل اعتمد بشكل كبير على الحظ ومحاولات إنقاذ التصوير في آخر لحظة.
وأوضح إن أكبر أزمة واجهتهم كانت مشاهد باريس، فرغم تخصيص ميزانية ضخمة للفيلم، الاستوديو رفض التصوير في فرنسا، وده دخل فريق العمل في أزمة حقيقية وهم بيصوروا في نيويورك من غير خطة واضحة لمشاهد العاصمة الفرنسية.
كمان كشف إن النجمة ميريل ستريب ماقدرتش تسافر باريس وقت التصوير، وده خلّى الفريق يبتكر حلول وتصوير بديل علشان يبان إن شخصية “ميراندا بريستلي” موجودة هناك فعلًا.
وأشار فرانكل إن أجواء الكواليس ماكنتش مستقرة، خاصة مع الضغوط الكبيرة اللي كانت موجودة وقتها، بالإضافة لمرور آن هاثاواي وإيميلي بلانت بظروف شخصية صعبة خلال فترة التصوير.
وفي النهاية، وصف المخرج التجربة بأنها من أصعب الأعمال اللي اشتغل عليها، لكن رغم كل الأزمات، قدر الفيلم يحقق نجاح عالمي ويثبت نفسه كواحد من أهم أفلام الموضة والإعلام في السينما العالمية
