واضح إن أسطورة مايكل جاكسون لسه عايشة بقوة، لأن فيلم السيرة الذاتية “Michael” قلب شباك التذاكر العالمي بعد ما حقق إيرادات ضخمة وصلت لـ577 مليون دولار خلال 3 أسابيع بس من عرضه، عشان يبقى تاني أعلى فيلم سيرة موسيقية تحقيقًا للإيرادات في تاريخ السينما، متفوقًا على فيلم “Elvis”.
الفيلم من بطولة جعفر جاكسون، ابن شقيق مايكل جاكسون، واللي خطف الأنظار بأدائه وتقليده الدقيق لحركات وأسلوب “ملك البوب”، خاصة في مشاهد الـMoonwalk وحفلات “Thriller” الأيقونية.
وحقق “Michael” حوالي 240.4 مليون دولار داخل أمريكا، و336.8 مليون دولار عالميًا، مع نجاح ضخم في دول زي فرنسا، ألمانيا، بريطانيا، أستراليا والبرازيل، بينما لسه فيلم “Bohemian Rhapsody” محتفظ بالمركز الأول بإيرادات تخطت 910 ملايين دولار.
النجاح الكبير للفيلم جه رغم الجدل اللي حصل وقت التصوير، خصوصًا بعد إعادة تصوير مشاهد كاملة بتكلفة وصلت لـ50 مليون دولار، لترتفع الميزانية النهائية لـ200 مليون دولار تقريبًا.
الفيلم من إخراج أنطوان فوكوا، وبيستعرض رحلة مايكل جاكسون من طفولته مع فرقة “Jackson 5” لحد ما بقى واحد من أهم نجوم الموسيقى في التاريخ، مع التركيز على حياته الشخصية وضغوط الشهرة وعلاقته المعقدة بوالده.
ورغم إن تقييمات النقاد ما كانتش الأفضل، الجمهور كان له رأي تاني تمامًا، وده اللي ظهر بوضوح في الإيرادات القياسية والتريند العالمي اللي عمله الفيلم من أول يوم عرض
